Frambjóðandi

Það er gott að búa í mínu sveitarfélagi.

Svona svarar Ásta Þ. Skjalddal Guðjónsdóttir:
Reykjavík er svo skemmtilega fjölbreytt borg. Allt frá iðandi miðbæjarlífinu, hverfunum sem einkennast af byggingarstíl hvers tíma, vel skipulögðum úthverfunum og svo frelsi þess að geta búið í sveit í borg í ysta hverfi borgarinnar, á Kjalarnesi.

Ég er ánægð/ur með þá þjónustu sem sveitarfélagið veitir mér.

Svona svarar Ásta Þ. Skjalddal Guðjónsdóttir:
Ég er nokkuð ánægð með þjónustuna en er með tillögur til að bæta hana enn frekar.

Hvernig ættu skattar og gjöld að vera í sveitarfélaginu miðað við stöðuna í dag?

Svona svarar Ásta Þ. Skjalddal Guðjónsdóttir:
Óbreytt uns ALLIR leggja sitt af mörkum, þá getum við lækkað.

Þegar skipulögð er byggð í sveitarfélaginu ætti frekar að leggja áherslu á ný hverfi en þéttingu byggðar.

Svona svarar Ásta Þ. Skjalddal Guðjónsdóttir:
Þétting getur verið skynsamlegur kostur til að nýta innviði sem fyrir eru eins og t.d. á Kjalarnesi en þétting má ekki verða of mikil og ekki á kostnað grænna svæða.

Fjölga ætti íbúakosningum svo að almenningur geti tekið meiri þátt í ákvörðunum í sveitarfélaginu.

Svona svarar Ásta Þ. Skjalddal Guðjónsdóttir:
Vinna þarf meira með íbúum og í þágu íbúa, íbúakosningar er ein leið til þess en ekki sú eina.

Sveitarfélögum ætti að vera skylt að lögum að sjá börnum fyrir leikskólavist frá tólf mánaða aldri.

Svona svarar Ásta Þ. Skjalddal Guðjónsdóttir:
Leikskólavist ætti vissulega að vera í boði frá 12 mánaða aldri fyrir alla þá sem þurfa á því að halda en ekki sem skylda. Ég myndi vilja sjá fæðingarorlofið lengt þannig að foreldrar eigi val.

Sveitarfélagið mitt ætti að bjóða heimgreiðslur til foreldra til að auðvelda þeim að vera heima með börnum frá því að fæðingarorlofi lýkur og fram að leikskólavist.

Svona svarar Ásta Þ. Skjalddal Guðjónsdóttir:
Í fullkomnum heimi væri svarið já og ég myndi svo gjarnan vilja segja já, en við erum ekki komin þangað og þess vegna ber okkur að forgangsraða þeim fjármunum sem við höfum.

Hvetja ætti foreldra til að stytta vistunartíma leikskólabarna gegn afslætti af gjöldum.

Svona svarar Ásta Þ. Skjalddal Guðjónsdóttir:
Hvatningin má gjarnan vera til staðar en hún má ekki vera á kostnað þeirra sem ekki geta leyft sér slíka styttingu vegna erfiðra aðstæðna.

Sveitarfélagið ætti að beita sér fyrir frekari útvistun verkefna sinna við rekstur leik- og grunnskóla

Svona svarar Ásta Þ. Skjalddal Guðjónsdóttir:
Börn ættu alltaf að fá bestu mögulegu þjónustu. Útvistun sem býður einkaaðilum upp á að hagnast á kostnað þjónustu til að greiða sér arð frekar en að nýta féð til að bæta þjónustuna, hugnast mér einfaldlega ekki.

Sveitarfélagið ætti að niðurgreiða íþrótta- og tómstundaiðkun barna meira en nú er gert.

Verja ætti meira fé til að styðja menningarlíf í sveitarfélaginu.

Svona svarar Ásta Þ. Skjalddal Guðjónsdóttir:
Menning og listir eru samfélagsleg verðmæti.

Hælisleitendur á barnsaldri ættu að fá sömu þjónustu í sveitarfélaginu og aðrir íbúar.

Svona svarar Ásta Þ. Skjalddal Guðjónsdóttir:
Sveitarfélögum ber skylda til að þjónusta öll börn innan sveitarfélagsins, það er ekki sveitarfélagsins (eða borgarfulltrúanna) að velja úr hópnum.

Snjómokstur og götusópun er fullnægjandi í mínu sveitarfélagi.

Svona svarar Ásta Þ. Skjalddal Guðjónsdóttir:
Miðað við mína búsetu.

Sveitarfélagið ætti að greiða leið nýrra fyrirtækja sem vilja hefja starfsemi á svæðinu, með fjárhagslegum ívilnunum

Svona svarar Ásta Þ. Skjalddal Guðjónsdóttir:
Ég er til í að heyra rökin með og á móti en ég sé í fljótu bragði ekki að það sé mikið jafnræði í því.

Sveitarfélagið þarf að auka fjárhagsaðstoð við þá íbúa sem lifa undir fátæktarmörkum.

Svona svarar Ásta Þ. Skjalddal Guðjónsdóttir:
Við þurfum öll að geta lifað mannsæmandi lífi.

Lengja ætti opnunartíma sundlauga, þótt það kosti sveitarfélög fé.

Svona svarar Ásta Þ. Skjalddal Guðjónsdóttir:
Sund er heilsueflandi og fjölskylduvænt sport.

Sveitarfélög hafa gengið of langt í að skikka íbúa til að flokka sorp.

Svona svarar Ásta Þ. Skjalddal Guðjónsdóttir:
Við eigum aðeins eina jörð, það skiptir máli hvernig við göngum um hana.

Sveitarfélög ættu að verja meira fé í þjónustu við eldri borgara.

Svona svarar Ásta Þ. Skjalddal Guðjónsdóttir:
Styðja þarf betur við félagsmiðstöðvar eldri borgara í eigin húsnæði.

Sveitarfélög ættu að greiða eldri borgurum frístundastyrk.

Svona svarar Ásta Þ. Skjalddal Guðjónsdóttir:
Hugsanlega gæti verið skilvirkara að styðja betur við félagsmiðstöðvar eldri borgara.

Sveitarfélagið á að taka þátt í svokölluðum samgöngusáttmála höfuðborgarsvæðisins.

Svona svarar Ásta Þ. Skjalddal Guðjónsdóttir:
Lagt hefur verið af stað í vegferð með ráðandi stjórnvöldum og illa hægt að bakka út úr því í miðju kafi. Hins vegar eru þættir sem má breyta og bæta til að auðvelda umferð samhliða þessu verkefni.

Ljúka á við Borgarlínu í þeirri mynd sem núverandi áform gera ráð fyrir.

Svona svarar Ásta Þ. Skjalddal Guðjónsdóttir:
Það má styðja betur við almenna umferð OG ljúka Borgarlínu á sama tíma.

Fækka á akreinum fyrir almenna bílaumferð til að búa til pláss fyrir sérakreinar fyrir strætó.

Svona svarar Ásta Þ. Skjalddal Guðjónsdóttir:
Auðvitað myndi ég vilja halda þessum akreinum fyrir almenna umferð en það þarf að byggja upp nothæfar, hraðvirkar og öruggar almenningssamgöngur til að leysa hnútinn sem fer svo ört stækkandi.

Að minnsta kosti eitt bílastæði á að fylgja hverri íbúð í sveitarfélaginu.

Svona svarar Ásta Þ. Skjalddal Guðjónsdóttir:
Auðvitað.

Það eru of margir einkabílar í umferðinni.

Svona svarar Ásta Þ. Skjalddal Guðjónsdóttir:
Það er staðreynd sem blasir við alla virka morgna og aftur seinnipartinn - stressaðir bílstjórar í kappi við klukkuna, ein manneskja í hverjum bíl og langar bílaraðir sem silast áfram.

Það er rétt að takmarka aðgengi almennings að útivistarsvæðinu í Heiðmörk í þágu vatnsverndar.

Svona svarar Ásta Þ. Skjalddal Guðjónsdóttir:
Vatnið okkar og hreinleiki þess er afar mikilvægt en það er útivist líka. Finna þarf leiðir til að þetta fari saman.

Hverfi Reykjavíkur njóta jafnræðis þegar kemur að þjónustu sem sveitarfélagið veitir.

Svona svarar Ásta Þ. Skjalddal Guðjónsdóttir:
Ég verð að miða við eigin búsetu en ég bý á Kjalarnesi, við Kjalnesingar getum því miður ekki tekið undir þetta hingað til.

Festa á svokallaða Reykjavíkurleið í leikskólamálum í sessi til framtíðar.

Svona svarar Ásta Þ. Skjalddal Guðjónsdóttir:
Fyrst þarf að fá reynslu af notkun leiðarinnar, síðan er hægt að taka ákvarðanir um breytingar ef þarf.

Koma þarf í veg fyrir fyrirhugaðar breytingar á skipulagi Suðurlandsbrautar.

Hætta á við fyrirhuguð Miklubrautargöng.

Einkavæða ætti Orkuveitu Reykjavíkur

Svona svarar Ásta Þ. Skjalddal Guðjónsdóttir:
Nei - einkavæðing innviða er ekki í lagi. Hinn almenni íbúi tapar alltaf á slíkum gjörningum.

Reykjavíkurflugvöllur á að vera í Vatnsmýri til frambúðar.

Svona svarar Ásta Þ. Skjalddal Guðjónsdóttir:
Ég vil ekki missa flugvöllinn, það er mín persónulega skoðun að flugvöllurinn sé of mikilvæg tenging við landsbyggðina, enn sem komið er, til að mega missa sín.

Hver eru mikilvægustu kosningamálin?

Svona svarar Ásta Þ. Skjalddal Guðjónsdóttir:
Það sem snýr að íbúunum sjálfum er í fyrsta sæti í mínum huga, ég vil borg fyrir okkur öll. Annað sem ég vil beita mér fyrir er fjölgun NPA samninga og P-merktra bílastæða.